بداية أعتذر لمن لم يفهم التدوينة السابقة فأحيانا أكتب لنفسي كفضفضة أكثر منها كتابة لأحد لأن مدونتي هي أجندتي الخاصة أيضا أرجع إليها عندما أريد أن أتذكر أو أتعلم أو حتى أضحك أو أبكي وشكراً لمن وجدها تمس شيئا عنده فأثنى عليها !
***
زمان كنت أهلوية أيام الخطيب والبيت كله كان أهلاوي ما عدا إتنين اختاروا يكونوا معارضة وشجعوا الزمالك طبعا كنا كأغلبية الشعب المصري الأهلاوي,
أغلبية لأن 9 قصاد 2 نبقى أغلبية ومن بعد اعتزال الخطيب حاولت أتابع بنفس الحماس بصراحة معرفتش وشيئا فشيئا مبقتش أشوف الماتشات المحلية نهائي لأن كل مرة أحاول أبقى زي الناس وأهتم بالكورة ألاقيها مضيعة للوقت وحرق للدم ورأيت الوجه القبيح منها وهي أنها مفرقة الجماعات وتبث التعصب والكراهية بين الأخوات وياريت ده بمقابل فاللاعبون يحصدون الملايين والجمهور يحصد حرق الدم وأحيانا الموت !!! فلما واحد يموت كمدا عشان ماتش كورة ده بصراحة هبل ومات فطيس !
لكن كل مشجعي الأندية المختلفة سواء أهلي أو زمالك أو ترسانة أو اسماعيلي لما كل الفرقاء دول يلعبوا تحت اسم منتخب مصر كان التشجيع بيختلف والعصبية بتخف " لا تختفي كلية " لكن بتخف لأن لو لاعب مثلا زملكاوي ضيع جون يقوم الأهلاوية يشتموا ويطالبوا بتغييره بلاعب أهلاوي بيفهم ولعيب وهكذا ,
طبعا أن مش كاتبة التدوينة دي عشان اتكلم عن الكورة لأني لم أعد اشجع إلا منتخب البرازيل :)
أنا بأكتب ده لأننا كما تعودنا بقينا منقسمين لفرق وأندية الدرجة الأولى حتى في حياتنا السياسية فالحرية والعدالة الممثل للإخوان تمثل الأغلبية فهم الأهلي والنور والسلفية الزمالك والكتلة مثلا الإسماعيلي والوسط الترسانة والثورة مستمرة مصنع 36 الحربي أو إمبي وأحزاب بتنزل لدوري الدرجة التانية والتالتة زي الوفد والتجمع وهكذا
والدوري أو الكاس هي مصر
والجمهور أو الضحية هم شعب مصر أو الأغلبية الصامتة اللي ألفت حرق الدم والموت كمدا وغيظا ويحصد الآخرين الملايين ودرع البطولة أو الكأس ومعاهم العربيات آخر موديل وبتزوجوا كمان من أجمل جميلات مصر ومعظم شباب المشجعين دول معندوش أمل يتزوج عرسة حتى !
العصبية الشديدة التى نراها ونسمعها لا تبشر بأى خير خاصة الصراع بين الأهلي والزمالك بين الإخوان والسلفية فبوادر الصراع الغير شريف ظهر وإظهار عيوب الآخر بقت من أول أهداف الحملات الإنتخابية والتشكيك في النوايا والكفاءة بقت علنية وكل واحد بيدعي حبا لليلى وعيون ليلى وشعب ليلى العظيم وهم مش حاسين إن ليلى كده حتطفش وتسيب لهم الجمل بما حمل لو مفكروش كلعيبة منتخب فقط وليس كلعيبة فرق
فكرة وسطية الإخوان وتطرف السلفية والسعي لتأكيد ميزة الأول والسعي لنفي التهم عن التاني بتقديم تنازلات أو عمل تحالفات مع الخصوم لضمان الأغلبية ده مفيهوش أى حب لليلى ولا يحقق أى اصلاح لليلى ويسىء بشدة للإسلام اللي مظلوم بناسه اللي نسيوا الهدف الأسمى وهو نجاح الفكر الإسلامي وأصبح الصراع على أحقية من يطبقه ويتقال له برافو إنت حلوووووو وأحسن من التاني العووووو
فيه من أندية الأحزاب الأخرى مظأططين من أى خلاف بين الإخوان والسلفية وبيشعللوا وبيدسوا بينهم اللي يخليهم مشعللين ومن الغباء السياسي والديني والإجتماعي وكل أنواع الغباء ألا يتعلموا من التاريخ شيئا ويكرروا نفس أخطاء من سبقهم ومن أضاعوا ملكهم بسبب التنابز والتناحر والفرقة ,
الأندية دي من المرتزقة بتعتمد مع وسائل أخرى" مجهزة ومعدة للهجوم " على فكرة الهدم الذاتي إنهم حيخلصوا على بعض وحيفضلوا منتظرين بكل الشوق واللهفة يلقفوا ليلى لما تقع من بين ايديهم ويحولوها لليليان وطبعا حتكون بحسنة وسيجارة وكأس وفستان أحمر شفاف وعاري الأكتاف أو بمايوه بيكيني أو ببدلة رقص وصاجات و حتجذب السياح اللي حيرموا الدولارات بالملايين تحت رجليها بس هي تقع منهم !!
طالما إحنا مبنفهمش في حياتنا أكتر من فهمنا للكورة " مع الأسف مع الألم " فهل من الممكن يا أهلي الإخوان وزمالك السلفية وبعض الأندية الأخرى الغير مشكوك في ولائهم لليلى تلعبوا فقط لمنتخب ليلى وتحبوا كلكم ليلى زي ما ربنا قال وبوصفة ربانية لا تخيب
(وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ وَاصْبِرُوا إِنَّ اللَّهَ مَعَ الصَّابِرِينَ)
صدق الله العظيم
صدق الله العظيم
هل ممكن ينظر السلفية للإخوان ولغيرهم من أطياف الشعب أنهم مسلمين موحدين هدفهم خدمة دينهم ورفعته حتى بدون لحية ونقاب والصبر عليهم والرفق بيهم واحترامهم واحترام اختلافهم معاهم !
وهل ممكن ينظر الإخوان للسلفية أنهم مسلمين موحدين هدفهم خدمة دينهم حتى مع تمسكهم الشديد بأصول قد يكون من الرومانسية الشديدة تحقيقها قريبا ويرفقوا بهم ويحترموا اختلافهم عنهم !
أنا لا أتصور مسلم مخلص للفكرة الإسلامية يكون متعصبا لنفسه أو لحزب أو لفرقة ويحارب أو يخاصم أو يصادم من يخدم نفس الفكرة فأكيد فيهم حاجة غلط
هل ممكن كل من يدعي وصلاً بليلى يثبت بالفعل لا بالقول حبه بأن يفضل مصلحة ليلى قبل مصلحته وينسى لون فانلة فريقه وبلحية ولا من غير لحية ويلعب بفانلة منتخب ليلى وشكل ليلى الكوكتيل العجيب الغريب !!
لحد بس ليلى ما تتعالج من اللي جرالها طوال 80 سنة وتقف على رجليها وينصلح حالها ووقتها الناس هي اللي حتحكم مين بجد كان بيحب ليلى ومخلص لليلى وعايز مصلحتها وتقر ليلى له بذاكَ
وإنه مكنش بيحبها عشان يكوش هو على كل حاجة وشعب ليلى يفضل يشجع ويهتف ويتحمل ويتبهدل وينضرب ويتسحل ويتشرد ويتسجن ويتشل ويموت وكأن ليلى عذابه الأبدي ولعنته الفرعونية اللي بيتوارثها جيل عن جيل وكأنه مش هو كيان ليلى و لا ليلى هو كيانها وكأن ليلى دي كيان هلامي افتراضي في كوكب زحل
يا أهلي الإخوان وزمالك السلفية وكل الأندية المحبة لليلى
ليلى مش مجرد أرض
ليلى مش مجرد كلمة يطبوللها تان تتان تان تان مصر
ليلى فكرة وطن يا يتعاش صح بما يرضي الله وبشرع الله يا نعزل ونسيب حتتنا ونشيل بؤجتنا ونقول عليه العوض ومنه العوض على العمر اللي ضاع في انتظار قيس وفي الآخر يطلع قيس كان ملطوع ليل ونهار يشعـِر حبا في ليلى على عتبة خيمتها عشان كان منظـّر على الخيمة بتاعتها لأنها بحرية وهوعنده حر !
